Sabunabad

Sabunabad...

Dünyanın ən qədim, ən güclü və ən əəəən xalqı olan sabunabadlılara həsr edilir.

Sabunabad , Qafqaz sıra dağlarının və Xəzər dənizinin ətrafında yerləşən gözəl bir ölkədir. Vaxtilə bu ölkənin ərazisi 410.000 kv.km-dan çox olub. Amma qonaqpərvər və qədim sabunabadlılar hər gələnə bir az verə-verə 86,6.000 kv.km-lik ərazidə məskunlaşıb ki, onun da 20.000 kv.km sahəsi onun tarixi ərazilərində yaradılan Hayastan tərəfindən işğal edilib. Bu iki dövlət arasında atəşkəs 25 il öncə imzalansa da hələ də hər gün bir sabunabadlının cəsədi gəlir evinə. Özü də maraqlı olan orasıdır ki, şəhid olanların hamısı kasib sabunabad əhalisidir. Bir nəfər də olsa varlı sabunabadlı şəhid olmur. Çünki onların balaları əsgər kimi , paytaxt Sabunoba və ona yaxın ərazilərdə xidmət edir. Bu sabunabadlıların dilində xalq şairlərindən birinin

“Mənə bir varlı məmur sabun göstər,

Balası şəhid olsun” –sözləri əzbər olsa da, öz aralarında, “mən niyə övladımı ön cəbhəyə yollayıram ki, qoy nazirlərin , deputatların, rəislərin balası da getsin də” desə də, yenə də fərqi yoxdu. Çünki qarşı tərəfin dilində əzbər olan “Vətəni sevmək imandandır, Vətən sərhəddən başlayır” sloqanları hər dəfə kasıb xalqı necə susdurursa , girən yenə də kasıb sabunabadlılara girir. Sonra isə təsəlli olaraq vətəni sevmək kasıba varlıya baxmır, vətəni sevmək onun uğrunda ölmək hər kəsin borcudur deyərək yanan qəlblərini ovutmağa çalışırlar. Bu xalqın hərbi xidmət anlayışları da , hərbi mədəniyyəti də fərqlidir. Məsələn hərbidə yaxşı və pis oğlan söhbəti necə geniş yayılıbsa hətta bu söhbətə görə qardaş belə qardaşdan uzaq durur bəzən. Belə ki, hərbidə kimin pulu, day-dayı, gücü varsa olur yaxşı oğlan. Kim ki, zəif və kasıbdırsa olur pis oğlan. Nə xidmət varsa hamısına məhz o zəif və kasıb pis oğlanlar göndərilir. Bəzən bu pis oğlanlardan kimsə öz haqqlarını müdafiə etmək üçün üsyan edib ayağa qalxıb söz deyəndə bir neçə yaxşı oğlan onu tutub tualetə salıb başına çiş edir ki, ona öz yerini göstərsin. Yəni ki, kasıb və zəifsənsə yerin budur, yaşayacağın tale budur. Bununla da digər pis oğlanlar sayları çox olsa da qorxuya düşüb bir daha söz deyə bilmir. Halbuki birləşə bilsəydilər özləri yaxşı oğlan olacaqdı. Əmma ki bunun özündə də bir əmma var. Bunlar birləşib o yaxşı oğlanları devirib özləri yaxşı oğlan adını qazansalar da , az sonra özləri bir-birlərini didib dağıdacaq və özləri bir-birini pis oğlan olmaqda ittiham edərək parçalanacaqlar. Düşmən səngərin o başında olsa da , bir-birini düşmən görən , bir-birinə qarşı mübarizə aparan yeganə xalq məhz bunlardır. Bildiyiniz,bu sabunabadlılar çox fərqli və kreativ düşüncələrə sahibdirlər.

Bunların hərbi həyatları kimi, mülki həyatları da olduqca kreativdir. Məsələn pul verib hərbiyə yararsız adını alan bir şəxs sənə hərbidən , vətənpərvərlikdən elə dərs deyər ki, vallahi matın qutun quruyar. Hərbidə olduğu kimi elə adi həyatda da yaxşı və pis oğlan söhbəti var bu ölkədə. Konstitusiya kimi ali qanunları qoyub “Oğru qanunları” ilə hərəkət edən yüz minlərlə insandan danışmadım sizlərə. Əllərini ağdan qaraya vurmayan, öz valideynlərindən pul qoparıb çayxanalara yığışan bu gözəl varlıqlar bir qayda olaraq narkotik aludəçiləri olur. Kimi damara vurur , kimi ciyərinə çəkir. Damara vurduqları narkotikə “mal” , çəkdiklərinə isə “şey” deyirlər. Elə ki ciblərində pul bitdi ova çıxırlar. Harda kasıb və zəif görsələr tutub döyüb pulun telefonun əlindən alıb deyirlər ki, polisə şikayət etsən olacaqsan satqın, suka, cırıq. Birləşib bir zəifi döyərək qəhrəmanlıq edən bu gözəl varlıqların  özləri  polis görəndə az qalırlar onun dötünü öpsünlər. Hansısa bir oğlanın bacısı ya arvadı qısa geysə vəssalam. O oğlan avtomatik olaraq onların gözündə olur peysər. Təbii ki, əgər kasıbdırsa. Yox əgər pulu varsa elə o oğlanın da dötünə girəcək qədər mənəviyyata sahibdir bu gözəl varlıqlar. Elə xalq da eynən bucürdü. Filan kasıbın arvadı səliqəli, biraz qısa geyirsə qadınlı kişili hamı ona alçaq kimi baxır. Yox əgər filan varlının arvadı ya qızı açıq saçıq geyirsə buna dəb deyirlər. Bu xalqın bir düşüncəsi də odur ki, harda maşın sürən qadın görsələr avtomatik olaraq düşünürlər ki, yüz faiz bu kiminsə saxladığıdır. Day düşünə bilmirlər ki, bəlkə atası, əri, qardaşı , bəlkə elə özü pul yığıb  və ya kreditlə alıb . Əsas odur ki maşın sürürsə deməli kiməsə verir.

Bu xalqın kişilik və cəsarət anlayışı da fərqlidir. Xırda bir müqayisə edim. Avropada bir balaca qiymət artımı olsa, hökümət nəsə etməyə çalışsa xalq küçələrə axışır , mübarizə aparır öz haqqların qoruyur. Burda isə fərqlidir. Hökümət hər gün nə istəsə edir, necə istəsə elə davranır. Bunlar isə susur. Atalarına dəhşət bağlı olan bu xalq danışmaq gümüşdürsə susmaq qızıldır prinsipindən istifadə edərək elə susur ki, hətta onlarla məzələnən hakim və məmurlar əsəbləşir ki, ayə biraz etiraz edin də. Bir səsnizi çıxarın biz də nəsə edək, tutub basaq içəri, biraz pul sağaq filan. Amma bu xalq susur. Ayə mən qalxsam nə olacaq nə dəyişəcək, kim gələcək mənimlə, bu müxalifət elə özlərinindir, guya bundan sonra gələn yaxşı olacaq, bu yeyib doyub heçolmasa, başqası gəlsə daha pis günə qoyacaq bizi deyə-deyə xalq özü-özünü təmizə çıxarmaq istəyir ki, vicdanı rahat olsun. Amma anlamırlar ki, onlar vicdanı çoxdan laaaaap çoxdan itirib. Qonşularına edilən haqsızlıqlara susanda itirdilər bu vicdanı. Başqalarını şərləyib tutanda itirdilər bu vicdanı. Haqqı tapdayıb, zülmə boyun əyib susanda itirdilər bu vicdanı. 250 manat maaş alıb, qorxudan şükr bu günmüzə deyəndə itirdilər bu vicdanı. Buna baxmayaraq yenə də dünyanın ən vicdanlı xalqı məhz özləridir. Hakimiyyətin qabağında sussalar da, hansısa bir qadın və ya bir yazıçı haqqı deyəndə o saat şirə, pələngə dönür bu xalq. Keçən dəfə 20 yaşlı bir qız müharibə əleyhinə bir yazı paylaşıb , qəhrəmanlıq haqda düşüncələrin fərqli olduğunu dediyi üçün xalq necə ayağa qalxdısa , elə bildim hökümət çevrilişidir. Sən demə bir qızcığaza görə belə ediblərmiş. Özü də ən murdar formada apardılar bu qıza qarşı mübarizəni. Hətta hansısa palkovnik durub məhkəməyə də verdi o qızı. Amma hər gün gözlərinin önündə nə qədər məmur bu xalqı ələ salıb, alçaltsa da, rüşvət tələb etsə də , biri ayaqa qalxıb məhkəmə nədir, heç M hərfini belə dilə gətirməz. Avropada bir nazir dövlətin ona verdiyi maşını iş saatından sonra sürdüyü üçün xalq tərəfdən məhkəməyə verilib işdən azad ediləndə, bu xalq ancaq haqqı deyənləri məhkəməyə verir.  Bu xalq ancaq haqq uğrunda mübarizə aparanları əzib tapdalayır.  Sabunabadlıların ən bədbaxt tərəfindən biri də odur ki, ziyalıları, qələm sahibləri, müəllimləri belə sabundur. Bu ölkənin qələm sahibləri  yazmadan öncə qələmlərini sabunlayırlar ki, yazdıqları yuxarıların xoşuna gəlsin ki, bəlkə ev, vəzifə zad qopara bildilər. Bəziləri isə sabun tapa bilməyəndə sadəcə susaraq ədəbiyyat xatirinə yazdığını deyir. Müəllimləri demirəm hələ. Şagirdlərə elə ilk günlərdən zərbəni məhz müəllimlər vurur. Varlı və məmur balalarını gözlərinin qarası kimi əziz tutan müəllimlər seçki olan kimi başlayırlar kütləvi saxtakarlıqlara. Bir iki artıq dərs saatı üçün etmədikləri qalmır. Təhsil nazirliyi isəı ildə iki dəfə dərs metodikası dəyişir. Olan isə yazıq şagirdlərə olur.

Müəllimdən danışıb həkimdən deməsəm haqsızlıq olar. Bu ölkədə Tibb universiteti həkim yox, şərəfsiz, əzrayıl məzun edir. Hansı həkimə baxsan savadı az, amma , pulu çoxdur. Dərman firmaları ilə birləşib keyfiyyətsiz və baha dərmanları xalqa məcbur verdirirlər ki, faiz əldə etsinlər. Vay o gündən hansısa xəstəni müalicə etsinlər. O xəstə ya öləcək ya da yarımcan halda xaricə qaçaçaq. Baş ağrısı ilə həkimə getsən bil ki, böyrəyində daş, mədədə yara tapacaqlar. Bir sözlə təhsili kimi, səhiyyəsi də bərbad gündədir binəva sabunabadlıların. Xəstələndinsə sağalmalısan yox, sağılmalısan prinsipi işləyir bu ölkədə.

Aristotelin bir sözü var: Xalqı xalq edən onun siyasi mədəniyyətidir. Bu xalq elə gündədir ki, iqtidarı da müxalifəti də məlum deyil. Hər biri bu xalqı əzmək üçün çalışır. Məsələn götürək elə hakimiyyətdə olan Yeni Sabunlar Partiyasını. Müstəqilliyin ilk illərində qurulub, yeni üfüqlər, yeni gözəl həyat vəd etsə də, bu partiya ölkəni elə bir hala saldı ki, xalq hər yeni gün gələndə köhnə günə şükr edir. Partiyanın əsas iş prinsipi rəhbərliyi elə ailə içində saxlamaqdır. Belə ki yaradıldığı gündən bu yana Sabunsevərzadələrin başçılıq etdiyi bu partiya bir işi yaxşı bacardı. Ölkə nə qədər pis gündə olsa da, ustalıqla xalqı aldada bildilər ki, guya bu xalq hamıdan yaxşı yaşayır və bu xalq regionun ən güclü dövlətinə sahibdir. Binəva sabunabadlılar bunların yalan olduğunu bilə-bilə inandılar. Daha doğrusu inanmağa vadar edildilər. Çunki kimsə inanmayıb haqqı deyəndə partiyanın polisləri o adamı narkotik satıcısı, silah qaçaqmalçısı, vətən xaini adı ilə həbs edirlər. Bu azmış kimi o adamın ailəsin nəsil nəcabətin də işdən atdırıb elə səfil gününə salırlar ki, başqalarına da göz dağı olsun . Müxalif partiyalar isə hakim partiya ilə mübarizə aparmaq yerinə elə bir-birlərin  qırıb kimin daha gözəl müxalifət olduğunu isbat etməyə çalışırlar. Bildiyiniz, xalq üçün çalışan yoxdur bu ölkədə. Bunların heç biri xalqın vecinə deyil. Aclıq olsun kef olsun, ac ol kişi ol deyən sabunabadlılar özlərini dünyanın ən xoşbəxti sayır. Özlərini bədbəxt görənlər isə o müxalif partiyaların birinə yazılıb 5-10 sutka həbs cəzası almağa çalışır ki, Avropaya qaçıb orada yaşasın ki bəlkə xoşbəxt oldu. Qarın qardaşdan irəlidir, məndən ötdü qonşuma dəydi kimi atalar sözləri olan bu xalq ancaq özün düşünür. Öz qarnın öz namusun. Məsələn arvadını qızını bacısını evdən çölə qoymayıb ,namusun başqa gözlərdən qoruyan sabunabadlılar rahatlıqla öz qonşularının , dostlarının , qohumlarının arvadları ilə yata bilərlər. əsas mənim namusumdur deyən sabunabadlılar buna haqq qazandırmaq üçün yenə də öz atalarına istinad edirlər: dana göz eləməsə kələ dırmaşmaz. Yəni ki , başqa qadın baxmasa biz belə etmərik. Hətta başqa qadın baxmayanda veclərinə almayanda da yenə də o qadın sonuçda əxlaqsız çıxır. Bir sabunabadlı hansısa bir qadına göz qoyursa və ona əli çatmırsa ,acıqdan ətrafda o qadın haqda elə kompaniya qurur ki, hər kəs o qadını fahişə kimi tanıyır.

O qədər şeylər danışa bilərəm ki bu xalq haqqında. Məsələn pul töküb universitetə hazırlaşıb sonra da oxumamaq üçün rüşvət verənlərdən. Vicdan namus xalq mentalitet deyib  rüşvət alanlardan. Mentalitet demişkən, bunlar dini , milli və mənəvi dəyərləri hələ də ayıra bilmirlər. Məsələn ərəbin adət ənənəsini , dini qaydalarını öz milli dəyərləri kimi qələmə verirlər. Müqəddəs kitablarını oxumadan , onun haqqında bir cümlə bilmədən saatlarla səninlə din haqqında danışa bilərlər. Nə qədər gözəl insan olsan da əgər dinə inanmırsansa sənə biqeyrət deyəcəklər. Dini camiə bir neçə yerə ayrılıb. Şiə sünni vəhabi nə bilim nurçu süleymançı filan. Əslində hamı bir-birinə düşməndir. Bir-birinin qanın içməyə hazırdılar. Əgər bilsələr sən dinə inanmırsan o saat birləşib sənin qanını içəcəklər. Sonra da İslam birliyindən danışacaqlar saatlarla.

Hələ kimsə bu xalq uğrunda mübarizə aparsa deyəcəklər yüz faiz Amerikanın adamıdır. Ölkədə narazılıq olub xalq bir yerə yığışmaq istəsə elə bu dindar kütlə ayağa qalxacaq ki, həzərat sakin olun, bu amerikalıların, sionistlərin işidir . Ölkədə bu qədər zülm varkən heç bir dindar ayağa qalxmır. Hakimiyyət Allahın iradəsidir deyib susurlar. Bir iki dəfə hicaba görə şiə qismi ayağa qalxsa da nəticəsiz oldu. Çünki şiələrin özləri belə parçalanıb. Bildiyin cəmiyyətləri kimi dini əqidələri də darmadağındı. Hərə öz əqidəsini düz bildiyi üçün digərləri ilə birləşmir. Sonra bunun da günahın Amerikada görürlər. Guya Amerika qoymur bunları. Biri namaza gələrkən Bismillahdan öncə ilk olaraq masonlar haqda öyrənir. Bu dindar kütləyə görə dünyada demokratiya adında bir şey yoxdur əslində. Hər ölkədə rəhbərləri məhz gözəgörünməz masonlar seçir. Əgər kimsə onlara işləməsə o vaxt hakimiyyət dəyişikliyi olur. Şiəsi İrana, sünnisi Türkiyəyə, vəhabisi Küveyt və Ərəbistana, nəqşibəndisi isə Rusiyaya meyl edən bu xalqın heç bir dindarı öz ölkəsinə bağlı deyil. Ən pisi də odur ki özlərini sudan elə quru çıxarırlar ki söz tapmırsan deməyə.

-         Sən bunları 1 həftənin içində necə analiz etdin əziz dost? Sən danışdıqca öz ölkəmizə şükr etdim. Qurban olum Azərbaycanımıza.

Vallah elə qurban olaq ölkəmizə. Sülh əmin amanlıq. Bir tikə çörəymizi yeyib dinc formada yaşayırıq. Aha bir də onu da deyim ki , ora istirahətə getmə əziz dost.

-         Niyə? Axı oralar cənnətdi.

Düzdü cənnətdir.  Amma bilsələr ki turistsən dibinəcən geydirəcəklər sənə. Taksilər 5 manatlıq yolu 50 manata aparacaq. Otellər 50 manatlıq otağı sənə 200 manata verəcək. Bu xalq saxtakarlığı aldatmağı özünə qəhrəmanlıq bilir. Özlərini o qədər aldadırlar ki, bunun əvəzini turistlərdən çıxırlar. Dincəlmək istəsən Gürcüstana get. Özləri də bunu öz xalq şeirləri ilə deyir:

Gəzməyə qərib ölkə,

Ölməyə vətən yaxşı...

Hələ çox şeyi demədim. Gələn dəfə danışarıq.